Përditësim mbi situatën aktuale

admin15 Dhjetor, 2020Shikime 2239

Viti 2020 pa dyshim ka qenë viti më i mirë për ne. Pandemia që erdhi papritur bëri që shumë njerëz të mbylleshin në shtëpi dhe sigurisht pjesë e tyre ishim dhe ne. Falë kohës së lirë që fituam, puna jonë u shtua me ritme të çmendura dhe ofruam shumë, shumë episode, seriale e filma të rinj. Shikimet arritën majat dhe për 1 vit kemi arritur gati 6 Milion shikime. ÇMENDURI! S’na e merrte kurrë mendja që do arrinim kaq shumë në 2020. E vlerësojmë shumë mbështetjen tuaj, pa të cilën nuk arrinim dot këtu sot.
Por, situata tani si është? Ç’do ndodhë nga këtu e tutje?

Gjërat e para në fillim

Pas karantinës që të gjithë filluam t’i rikthehemi jetës normale. Siç e dini, ne jemi një grup të rinjsh të cilët e krijuan Asenshu-në më shumë për pasion dhe pa pasur fitimin si qëllim. Gjatë kohës, pamë që animet po bëheshin të njohura në Shqipëri, dhe na pëlqeu që shumë e më shumë njerëz po na ndiqnin, prandaj menduam se nëse do fitonim nga një punë të cilën e bëjmë me dëshirë do ishte më e mira e mundshme. Fitime ende nuk ka, por nuk është ky problemi ynë. Sa më shumë kohë kalon, aq më shumë shtohen përgjegjësitë tona, dhe i gjithë ekipi po fillon të ketë më pak kohë se më parë. Kjo shpjegon se pse episodet po dalin më rrallë. Gjithsesi, po bëjmë më të mirën dhe ju sigurojmë që DHJETORI do jetë më aktiv se këto kohë me performancë të dobët. Nuk duam të nxitojmë me punën sepse cilësia mbi sasinë. Nxitimi ka qenë një gabim i kohës kur ne ishim me më pak eksperiencë dhe nuk duam ta përsërisim.

Naruto Shippuden

Po, e dimë që është seriali juaj i preferuar dhe që revoltoheni kur nuk ka episode të tij. E shpjeguam dhe më lart që nuk është dëshira jonë të publikojmë më pak episode. Mund të nxjerrim sasi më të mëdha, sigurisht, por ç’vlerë do kishte një përkthim i pakuptimtë? Këtë gjë po bën faqja shqiptare kolege, që mesa duket është tunduar nga shikimet e mëdha që marrin episodet e Narutos dhe po nxjerrin sasi të mëdha episodesh çdo ditë. Nëse doni sasi mund të shkoni t’i ndiqni atje, por nuk besoj se do kuptoni gjë pasi përkthimi është skandaloz. Normalisht, sepse puna bëhet nga minorenë që abuzohen duke i paguar 50 Lekë për episod. Turp i madh! Nuk e kuptojmë çfarë fitoni duke u munduar të na bëni konkurrencë, por dimë që të gjithë ato grupe që janë përpjekur ta bëjnë, tani nuk janë më. Gjithsesi, po punojmë përsëri për episodet e reja. Po mundohemi të sjellim të paktën një episod në ditë. Ju lutemi vetëm të keni durim.

Dragon Ball Z Kai

Me këtë serial e kemi tepruar. Jemi të vetëdijshëm që e kemi ndërprerë shpesh, por… Lajmi i mirë është që do rikthehet përsëri me episodet e fundit dhe do ta mbyllim brenda këtij viti. Kaq për DBKAI.

A do mbyllet Asenshu?

Kështu siç është situata momentalisht, mbyllja është e sigurt. Ama ne kemi ende shpresa se mund ta shmangim. Sinqerisht, do mundohemi të mbajmë bashkë grupin, por Asenshu na ha shumë kohë dhe nuk marrim gjë në këmbim. Është gjëja më e keqe që mund të bësh në këtë sistem kapitalist. Ama këtë e kemi bërë për tre vite edhe shikoni ku jemi sot. Do vazhdojmë para me shpresën që ka dritë në fund të tunelit.

KOMUNITETI

Nëse nuk e dini ende, ne kemi një komunitet të madh në platformën DISCORD të cilët kanë qenë shtysa jonë më e madhe që kemi arritur deri këtu. I falënderojmë shumë që të gjithë pjesëtarët tanë të DISCORD për mbështetjen dhe sigurisht ju ftojmë dhe ju të bëheni pjesë e tij. KLIKO KËTU!


Categories